Сцяжынкамі літаратурнай энцыклапедыі Мінска 20 красавіка 2023 года
Ад прадзедаў спакон вякоў
Мне засталася спадчына;
Паміж сваіх і чужакоў
Яна мне ласкай матчынай.
(Янка Купала. “Спадчына”)
Творчасць Янкі Купалы ўяўляе сабой энцыклапедыю жыцця беларускага народа. У 140-ую гадавіну з дня нараджэння нашага першага народнага паэта Беларусі (1925) Янкі Купалы (Івана Дамінікавіча Луцэвіча) супрацоўнікі бальніцы мелі цудоўную магчымасць дакрануцца як да творчасці песняра, так і пазнаць цікавыя старонкі яго жыцця падчас вандроўкі па парку імя Янкі Купалы і наведвання Дзяржаўнага літаратурнага музея Янкі Купалы ў Мінску. Наведвальнікі музея ўбачылі старонкі жыцця песняра, адчулі крыніцу яго творчасці, якая ішла ад народа, ад Беларускай зямлі, ад сучаснасці і гісторыі краю. Усе з захапленнем аглядалі экспазыцыю, слухалі супрацоўніка музея і экскурсавода. На кожным кроку літаратурнага падарожжа можна было ўбачыць унікальныя экспанаты: асабістыя рэчы паэта, яго атачэнне, крокі лёсу, адлюстраваныя старонкі дзейнасці на тэатральных пляцоўках. Асабіста цікава было пачытаць рукапісны тэкст “Мужык”, убачыць каліграфічны почырк Купалы і адчуць асалоду ад яго тэкста і мовы. Гэта частка вандроўкі скончылася каля старой таполі – “дачкі” купалаўскай таполі. Жадаючыя дакрануліся да гістарычнага дрэва і на хвілінку пачулі дух купалаўскіх часоў.
Каля помніка Максіму Багдановічу адбылася другая частка літаратурнай вандроўкі. Менавіта тут нашы калегі былі пад уражаннем ад талента Багдановіча, за кароткі жыццёвы час ён здолеў пакінуць вялікі творчы след у якасці паэта, публіцыста, літаратурнага крытыка, літаратуразнаўца, класіка беларускай літаратуры. Несмяротныя радкі паэта і сёння кранаюць за душу кожнага чалавека апантанага любоўю да Беларусі:
Цямнее край зубчаты бора...
І тчэ, забыўшыся, рука,
Заміж персідскага ўзора,
Цвяток радзімы васілька.
(Максім Багдановіч. “Слуцкія ткачыхі”)
Выказваем шчырую падзяку прафсаюзнаму камітэту Мінскай абласной дзіцячай клінічная бальніцы за арганізацыю вандроўкі.
Нататку падрыхтаваў Лазарчык І.В., намеснік галоўнага ўрача, кандыдат медыцынскіх навук.